Vinnumarkaðurinn

Isavia starfar á almennum vinnumarkaði, leggur áherslu að eiga gott samstarf við stéttarfélög og fylgir almennum kjarasamningum sem Samtök atvinnulífsins hafa gert fyrir hönd félagsins við fjölmörg stéttarfélög. Sérstakir kjarasamningar eru við Landssamband slökkviliðsmanna (LSS), Félag flugmálastarfsmanna ríkisins (FFR), Sameyki (SFR) og Félag íslenskra flugumferðastjóra (FÍF).

Uppsagnarfrestur starfsfólks er samkvæmt viðeigandi kjarasamningum og getur verið ólíkur eftir starfs- og lífaldri. Uppsagnarfrestur er gagnkvæmur og eru allar uppsagnir skriflegar.
Isavia fylgir lögum og reglum um vinnumarkaðinn og mannréttindi og ræður ekki fólk undir 18 ára aldri í vinnu.

Ráðningar

Isavia leggur áherslu á að ráða til starfa hæfasta starfsfólk sem völ er á hverju sinni og allar ráðningar byggjast á hæfni, menntun og starfsreynslu. Við ráðningar og framgang í starfi er fylgt jafnréttisstefnu og jafnréttisáætlun Isavia.  Tekið er vel á móti nýju starfsfólki og því veitt tækifæri til aðlögunar og starfsþjálfunar. Því er mikilvægt að allir taki höndum saman til að lágmarka þann tíma sem það tekur að gera nýtt starfsfólk virkt og ánægt. Í þessu felst t.d. nýliðanámskeið, skýrar starfslýsingar, kynning á samstarfsfólki, vinnustað o.fl. Isavia leggur áherslu á stundvísi og að starfsfólk sinni starfi sínu af trúmennsku.

Alls voru um 250 ráðningar í störf hjá Isavia árinu 2019 og þar af voru um 180 sumarráðningar. Starfsmannaveltan var um 14% á árinu. Starfsmannaveltan er misjöfn eftir störfum og sviðum.

Starfslok starfsfólks miðast við lok þess mánaðar sem 67 ára lífaldri er náð, en félagsmenn Félags íslenskra flugumferðarstjóra ljúka störfum við 63 ára aldur. Isavia býður upp á starfslokanámskeið sem ætlað þeim sem nálgast starfslokaaldur og er mökum boðið með á námskeiðið. Á námskeiðinu er farið yfir gagnlegar upplýsingar og fjallað um þessi tímamót á starfsævinni. Árið 2019 sóttu 25 starfsmenn slíkt námskeið.

Starfsmannavelta eftir aldri og kyni GRI 401-1

Staffið - Starfsmannafélag

Starfsmannafélag Isavia og dótturfyrirtækja, Staffið, stuðlar að fjölbreyttu og öflugu félagslífi og skipuleggur fjölda viðburða fyrir félagsmenn, t.d. fjölskyldudag á sumrin, jólahlaðborð, bíóferðir og keilukvöld. Auk þess hefur félagið samið um afsláttarkjör fyrir starfsfólk hjá ýmsum fyrirtækjum. Öllu starfsfólki býðst aðild að Staffinu. Félagið leggur áherslu á gott og fjölskylduvænt starfsumhverfi, öfluga fræðslu og þjálfun og jákvæðan starfsanda.

Fæðingarorlof

Isavia leggur áherslu á að koma til móts við óskir starfsfólks vegna fæðingarorlofs og mæta þörfum þeirra með sveigjanleika við endurkomu til starfa að því loknu. Alls fóru 78 starfsmenn í fæðingarorlof á árinu 2019, 43 konur og 35 karlar. Konur kjósa að verja lengri tíma í fæðingarorlof og nýta sameiginlegan rétt foreldra. Á árinu 2018 fór 91 starfsmaður í fæðingarorlof og 74 af þeim voru enn starfandi 12 mánuðum seinna.

FRÆÐSLA OG Þjálfun

Það er stefna Isavia að tryggja öllu starfsfólki viðeigandi þjálfun og stuðla að því að það hafi þá hæfni sem til þarf til að ná góðum árangri í störfum sínum. Starfsfólk ber einnig sjálft mikla ábyrgð á því að viðhalda eigin menntun og færni. Við upphaf starfs fá allir senda rafræna nýliðakynningu og afhentan kynningarbækling. Síðan tekur við þjálfun eftir þjálfunaráætlun viðkomandi hópa.

Þjálfun flugverndarstarfsfólks, flugvallarstarfsfólks og flugumferðastjóra fylgir þjálfunaráætlunum sem samþykktar eru af Samgöngustofu. Aðrir minni hópar fylgja þjálfunaráætlun sem tekur mið af störfum þeirra og hæfnikröfum fyrir hvert starf fyrir sig. Þjálfunaráætlun starfsfólks byggist yfirleitt á fornámi sem inniheldur stafræn námskeið, grunnnámi sem er blanda af bóklegum námskeiðum og verklegri þjálfun og starfsþjálfun sem fer fram á starfsstöð. Reglubundin þjálfun og endurmenntun eru hluti af daglegum störfum meirihluta starfsfólks.

Við lok nýliðaþjálfunar fer flest starfsfólk sem vinnur í framlínu í hæfnimat. Einnig fer fram formlegt námsmat í lok námskeiða í formi skriflegra prófa og krossaprófa. Reglulega er gæði kennslunnar metin með námskeiðsmati.

Sérstaða félagsins í fræðslu og þjálfun snýr að því að flestir hljóta sína grunnþjálfun hjá Isavia og er það starfsfólk félagsins sem sér um að leiðbeina. Þeir sem sinna fræðslu innan fyrirtækisins fá til þess sérstaka þjálfun. Síðustu árin hefur í auknu mæli verið boðið upp á blandað nám þar sem bókleg kennsla fer fram á námsvef Isavia en verkleg kennsla á starfsstöð. Lögð er áhersla á fjölbreyttar kennsluaðferðir og er mikið notast við upplýsingatækni í miðlun. Fjölmörg námskeið sem áður voru kennd í kennslustofu eru nú stafræn og vistuð í námsumsjónarkerfi félagsins. Öll fræðsla og þjálfun sem starfsfólk Isavia sækir eru skráð í mannauðskerfið Kjarna, bæði þjálfun sem er veitt innanhúss og námskeið sem starfsfólk sækir utan Isavia.

Auk þess að sinna þjálfun sem bundin er regluverki er stöðug leit að fræðslu sem eflir starfsfólk bæði faglega og persónulega. Fjölbreytt úrval slíkra námskeiða er í boði á hverju ári. Við val á námskeiðum er tekið mið af stefnu félagsins, gildum og þeim verkefnum sem eru í gangi. Einnig hafa niðurstöður vinnustaðagreininga áhrif á val á innihaldi fræðslunnar.

Stjórnendaþjálfun

Árlega er boðið upp á fjölbreytt úrval námskeiða sem eru sérstaklega ætluð stjórnendum. Markmið Isavia er að allir sem eru með mannaforráð fái grunnþjálfun í stjórnun. Í vinnslu eru þjálfunaráætlanir fyrir stjórnendur og eru þær þrepaskiptar eftir því í hvaða stöðu stjórnandi er. Áherslur í þjálfun stjórnenda hafa flust mikið yfir á mýkri þætti eins og samskipti, traust og aðlögunarhæfni. Einnig hefur verið lögð áhersla á stjórnun verkefna, tímastjórnun og hæfni til að takast á við erfið starfsmannamál. Meðalfjöldi klukkustunda í þjálfun stjórnenda voru 28 klst. miðað við 46 klst. fyrir annað starfsfólk.

Umfjöllun um tölurnar

Fræðslustundir námu 52.666 klukkustundum árið 2019 og jafngildir það því að allir starfsmenn félagsins hafi hlotið um 46 klukkustundir í þjálfun á árinu. Um 90% af fræðslustundum ársins eru vegna grunnþjálfunar, endurmenntunar, starfs- og síþjálfunar sem starfsmenn þurfa á að halda til að viðhalda réttindum og hæfni til að sinna störfum sínum. Þetta eru starfsmenn flugleiðsögu, flugverndar og flugvallarþjónustu. Starfsmenn annarra sviða og deilda sækja einnig námskeið og fræðslufundi innanlands og erlendis.

Árið 2018 var metár hvað varðar meðalfjölda fræðslustunda á hvern starfsmann en talan lækkar töluvert árið 2019. Helstu skýringar á þessari lækkun eru; færri nýráðningar og mun færra sumarstarfsfólk. Einnig var þjálfunarbann í gildi hjá Flugleiðsögusviði hálft árið sem þýddi að nemar þurftu að fresta starfsþjálfun sinni og öll þjálfun dróst saman. Árið 2018 var ráðist í átak í bæði endurmenntun atvinnubílstjóra, fræðslu um nýja persónuvernd og kynningar á félagslegu umhverfi sem kallaði á margar fræðslustundir. Þessi fræðsla var mun umfangsminni árið 2019 sem einnig skýrir muninn.

Meðalfjöldi fræðslustunda á hvern starfsmann GRI 404-1

Hluti af nýliðafræðslu fyrirtækisins snýr að félagslega umhverfinu þar sem meðal annars jafnréttisstefna félagsins og viðbragðsáætlun gegn einelti og annarri sálfélagslegri áreitni eru kynntar. Í viðbragðsáætluninni kemur meðal annars fram hvaða aðstoð er í boði innan fyrirtækisins og hjá stéttarfélögum. Lögð er áhersla á að tilkynningarleiðir séu ljósar,  starfsfólk viti hvert á að leita og boðleiðir séu skýrar fyrir þolanda og geranda. Á árinu 2019 bárust átta tilkynningar um einelti, kynferðislegt og/eða kynbundið áreiti. Unnið var úr þeim samkvæmt áætlunum félagsins.

Allir framlínustarfsmenn á Keflavíkurflugvelli fá fræðslu um einkenni mansals. Námskeiðið er ætlað til að efla vitund starfsmanna í framlínu, fjallað er um hvað mansal er, helstu gerðir mansals, hvernig megi greina það og hvert eigi að tilkynna grun um mansal. Námskeiðið er einnig aðgengilegt fyrir ýmsa hagaðila bæði innanlands og utan.