Vinnuvernd og öryggi

Vinnuvernd hjá Isavia

Hjá Isavia er í gildi vinnuverndarstefna sem tekur til allrar starfsemi félagsins og byggir á gildum og heildarstefnu Isavia. Með stefnunni skuldbindur félagið sig til að vera til fyrirmyndar í öryggis, heilsu og vinnuverndarmálum með því að stuðla að öruggu og heilsusamlegu vinnuumhverfi fyrir þá sem starfa á og heimsækja starfstöðvar félagsins. Með því er bæði reynt að koma í veg fyrir slys á fólki og einnig huga að aðbúnaði starfsfólks til að tryggja heilsusamlegt vinnuumhverfi. Forstjóri samþykkir stefnuna og framkvæmdastjórar sjá um að framfylgja stefnunni.

Stjórnkerfi vinnuverndar er hluti af gæðakerfi Isavia. Á árinu var fylgt eftir gildandi vottun ISO45001 fyrir hluta af starfsemi Keflavíkurflugvallar. Sú vinna hefur skilað sér í aukinni öryggisvitund í öllu fyrirtækinu. Vinnuvernd er höfð að leiðarljósi í starfsemi félagsins og unnið er að því greina hættur og grípa til mótvægisaðgerða. Markvisst er unnið að því að auka öryggisvitund í daglegu starfi hjá félaginu, til dæmis var uppfært fræðsluefni um vinnuvernd sent til allra starfsmanna í öryggisviku Isavia. Áhersla er lögð á að starfsmenn tilkynni slys , næstum því slys eða aðstæður sem geta orsakað slys, og að allir bera ábyrgð í öryggismálum fyrirtækisins.

Á árinu voru gerðar breytingar á skipulagi vinnuverndar og öryggismála og stjórnun og samræming þeirra færð undir eitt svið, þjónustu og rekstur. Þar með skapaðist tækifæri til að vinna markvissar með málaflokkinn fyrir allt fyrirtækið. Þá var einnig gefin út samræmd vinnuverndarhandbók í Áttavitanum, rekstrarhandbók Isavia. Á sviðinu starfar vinnuverndarfulltrúi sem ber ábyrgð á skráningu slysa, atvika og rýni þeirra. Sálfélagslegir þættir vinnuverndar eru þó enn undir stjórn fjármála- og mannauðssviðs Isavia.

Tilkynntum vinnuslysum fækkaði á síðasta ári úr 65 í 39 árið 2020, þar af fækkuðu alvarlegum slysum (fjarveruslysum) úr 19 í 4 árið 2020. Umfang tilkynninga bendir til að sú áhersla sem hefur verið lögð á að starfsfólk tilkynni slys og næstum því slys hafi skilað sér. Það leiðir af sér að unnt er að vinna að forvörnum og úrbótum með markvissum hætti.

Það verður áfram unnið markvisst að fækkun slysa á vinnustöðum Isavia. Fyrir árið 2021 verður unnið að samræmingu tilkynninga á slysum, einföldun skráninga og gera þær notendavænni. Það mun einfalda úrvinnslu og eftirfylgni í öryggisstjórnunarkerfi Isavia, Opscom.

Starfrækt er lögbundin öryggisnefnd vinnuverndar með aðilum þvert á fyrirtækið. Í henni eru bæði öryggisverðir sem eru skipaðir í nefndina af Isavia og öryggistrúnaðarmenn sem eru fulltrúar starfsfólks. Formaður öryggisnefndar er vinnuverndarfulltrúi Isavia og ber hann ábyrgð á að skipuleggja fundi hennar. Öryggisnefndin ber ábyrgð á að fara yfir stöðu frávika og úrbóta, rýna slys og tilkynningar sem og skýrslur vinnueftirlits. Öryggisnefndinni er ætlað að ýta undir öryggisvitund starfsfólks með þjálfun og fræðslu og tryggja að farið sé eftir lögum og reglugerðum í starfseminni. Nefndin taldi mikilvægt að nefndarfólk kæmu í auknum mæli að formlegu vinnuverndarstarfi félagsins, meðal annars vegna áhættumata.

Vinnuvernd / vinnutengd slys hjá starfsfólki Isavia GRI 403-9

Isavia er með vöktunaráætlun heilsufarsþátta á stöðum sem taldir hafa verið sérstaklega viðkvæmir eftir áhættumat, og þeir skoðaðir út frá hávaða, loftgæðum og titring. Sem liður í að stuðla að öruggu- og heilsusamlegu vinnuumhverfi var starfsfólki boðið upp á fræðslu um heilsu- og vellíðan á vinnustað og um Covid-19.

Skráningar á slysum og næstum því slysum fer fram í gegnum innri vef Isavia og fyrir utanaðkomandi aðila á heimasíðu Keflavíkurflugvallar. Vinnuverndarfulltrúi sér um að halda utan um þessi atvik og tilkynna þeim sem bera ábyrgð á úrbótum. Öll atvik eru orsakagreind. Með því er reynt að komast að rót vandans svo hægt sé að bregðast við og koma í veg fyrir að atvik endurtaki sig. Starfsfólki Isavia er skylt að tilkynna slys og við rannsókn er viðhöfð málsmeðferð sem kallast sanngirnismenning (just culture).

Isavia notar úttektargrunn S5 til að halda utan um öll frávik og úrbótatækifæri tengdum vinnuvernd. Reglulega eru framkvæmdar innri úttektir á vinnuvernd og árlega fer fram viðhaldsúttekt frá utanaðkomandi aðila vegna ISO45001 vottunarinnar.

Öryggisvika

Árleg öryggisvika Isavia var haldin í október 2020. Í ljósi aðstæðna var fyrirkomulagið með breyttu sniði. Boðið var upp á fræðslu og fyrirlestra rafrænt fyrir allt starfsfólk. Horft var til hugtaksins öryggi í víðu samhengi út frá vinnuvernd, upplýsingaöryggi, mikilvægi vellíðanar starfsfólks fyrir öryggisvitund, samskipti og öryggi í starfseminni. Einnig var lögð áhersla á mikilvægi öryggistilkynninga, þátttöku alls starfsfólks og voru stjórnendur sérstaklega hvattir til að ræða öryggismál í upphafi allra funda. Mikilvægt er fyrir Isavia að allir sinni öryggismálum vel því atvik sem geta komið upp geta haft víðtæk áhrif á félagið.

Akstur tækja og bíla sem og aksturshegðun var eitt af því sem öryggisteymi Isavia vann að úrbótum að á árinu. Unnið var fræðsluefni um notkun öryggisbelta samhliða því sem gildandi reglur um notkun öryggisbelta á Keflavíkurflugvelli voru endurskoðaðar. Markmið fræðslunnar var að auka vitund ökumanna um mikilvægi þess að nota alltaf öryggisbelti, líka á flugvelli, auka öryggisvitund og koma í veg fyrir slys. Lögð var áhersla á samvinnu við hagsmunaaðila og var fræðsluefninu dreift til þeirra sem hluti af öryggisvitundaráherslum í öryggisviku Isavia.