UMHVERFISMÁL

Við innleiðinguna voru mikilvægir umhverfisþættir í starfsemi Isavia ohf. greindir. Ítarleg vöktunaráætlun fyrir þessa þætti var sett upp og helsta umhverfisáhætta í starfseminni metin. Isaviaskólinn hafði yfirumsjón með uppsetningu á rafrænu námskeiði fyrir starfsmenn um umhverfisstefnu, aðgerðir í umhverfismálum og innleiðingu staðalsins, í samvinnu við umhverfisdeild Isavia. Námskeiðinu var svo ýtt úr vör í upphafi 2021.

Ein eining hjá Isavia ANS, flugfjarskipti í Gufunesi, hefur verið með ISO14001 vottun frá árinu 2018.

Eitt stórt mengunaróhapp varð á Keflavíkurflugvelli á síðasta ári. Það óhapp tengdist því þegar lendingabúnaður Boeing 757 vél Icelandair gaf sig. Rúmlega fimm þúsund lítrar af flugvélaeldsneyti láku á aðra flugbrautina. Sérþjálfað starfsfólk flugvallaþjónustu Keflavíkurflugvallar hreinsaði upp alla mengun áður en hún náði niður í jarðveginn við hlið flugbrautar. Frost var í jörðu sem hjálpaði og því þurfti engin jarðvegsskipti eftir þetta óhapp. Einnig áttu nokkur minniháttar eldsneytisóhöpp sér stað við áfyllingu á flughlaði á Keflavíkurflugvelli. Þar er um að ræða minniháttar leka á malbik sem hreinsaðir eru upp.

Engir úrskurðir hafa fallið þar sem félagið hefur verið talið brjóta gegn umhverfisverndarlögum.

Vatn

Isavia er meðvitað um mikilvægi þess að varðveita ferskleika og hreinleika grunnvatns í nærumhverfinu. Á Keflavíkurflugvelli hefur Verkís haft yfirumsjón með grunnvatnsrannsóknum. Sýni hafa verið tekin árlega frá árinu 2017. Enn eru að mælast óæskileg efni í grunnvatni á svæðinu sem flest má rekja til starfsemi þriðja aðila á árum áður, en þó í lágum styrk. Vísbendingar eru um að ástand grunnvatns á flugvallasvæðinu fari batnandi. Isavia mun halda áfram mælingum og vöktun á gæðum grunnvatns.

Isavia sækir vatn sitt í veitur hvers staðar fyrir sig og hefur ekki endurnýtt eða endurunnið vatn af flugvallasvæðum. Isavia hefur bætt fráveitulagnir undanfarin ár á alþjóðaflugvöllum sem jafnan tengjast fráveitukerfum viðkomandi sveitarfélaga. Árið 2016 var unnið að endurbótum á fráveitulögn frá vesturhluta Keflavíkurflugvallar sem fer í sjó fram. Þá var reist tveggja þrepa dælu– og hreinsistöð við Djúpavík sunnan Stafness í Sandgerðisbæ og ný og lengri útrás lögð í sjó fram. Að öðru leyti nýtir Isavia sér fráveitukerfi þeirra sveitarfélaga sem hver starfsstöð er í og er viðtakinn í öllum tilfellum sjór, en mismunandi er hversu mikil hreinsun er á fráveituvatninu. Olíuskiljur og settjarnir taka við bróðurparti þeirra mengandi efna sem að öðrum kosti myndu enda í fráveitunni.

Lífríki

Flugvallasvæði Isavia eru eins fjölbreytt hvað varðar lífríki eins og þau eru mörg. Reykjanesskaginn er Unesco jarðvangur og hefur mikla sérstöðu hvað varðar jarðminjar, sumar sem eru einstakar á heimsvísu. Líklega þekktasta dæmið þar um er hversu vel má sjá flekaskil Evrasíu – og Norður-Ameríkuflekana. Þó engar jarðminjar sé að finna á flugvallasvæði Keflavíkurflugvallar, er hann vissulega staðsettur á mjög jarðfræðilega merkilegu landsvæði.

Isavia hefur fylgst mjög vel með dýra- og fuglalífi innan sinna flugvallasvæða og greint nánasta umhverfi þeirra. Svæðin eru verulega fjölbreytt hvað varðar gróðurfar og fæðuframboð og því er ásókn villtra dýra og fugla mjög mismunandi á hverjum stað fyrir sig. Aðgerðir sem stuðla að minni hættu fyrir flugfarþega og minnka líkur á árekstri dýrs og flugvélar eru mikilvægur hluti af rekstri flugvalla. Fjölbreyttar aðferðir eru nýttar til fælinga dýra og fugla, m.a. búsvæðastjórnun.

Isavia hefur árum saman fylgst vel með dýralífi á flugvöllum um allt land. Starfsfólk Isavia sem sinnir dýralífsmálum skráir fjölda og tegundir þeirra dýra sem sjást á flugvöllunum. Mikil vinna fer í að fylgjast með og kortleggja atferli dýra, sérstaklega fugla, í og við flugvelli. Því býr það starfsfólk, sem þessu sinnir, yfir mikilli þekkingu í dýralífsstjórnun. Árið 2018 fékk Isavia Náttúrustofu Reykjaness og Þekkingasetur Suðurnesja til þess að gera ítarlega úttekt á fuglalífi Keflavíkurflugvallar. Síðast hafði slík úttekt verið gerð árið 1975. Niðurstöður þessarar rannsóknar hafa verið nýttar af starfsfólki flugvallarins til þess að bæta búsvæða- og dýralífsstjórnun á svæðinu.

Isavia skráir alla mögulega árekstra fugla og annarra villtra dýra við flugvélar á öllum sínum flugvöllum. Á síðasta ári voru 9 staðfestir árekstrar fugla við flugvélar á Keflavíkurflugvelli. Á innanlands-flugvöllunum voru ekki skráðir neinir árekstrar fugla við flugvélar.