80 ár frá afhendingu Breta á Reykjavíkurflugvelli
Í dag var haldið upp á tímamót í sögu íslenskrar flugsögu þar sem 80 ár eru nú liðin frá því að Reykjavíkurflugvöllur var afhentur Íslendingum til eignar og yfirráða, þann 6. júlí 1946. Reykjavíkurflugvöllur var að mestu byggður af breska hernum. Framkvæmdum lauk að mestum hluta árið 1942. Upphaflegt hlutverk vallarins var að þjóna flugvélum breska hersins og bandamanna þeirra. Þann 4. júlí 1946, eftir lok Seinni heimsstyrjaldar, var samningur undirritaður um að afhenda flugvöllinn Íslendingum til eignar og umráða. Afhendingin átti sér stað tveimur dögum síðar.
Boðið var til veislu af tilefninu á vellinum í dag þar sem fulltrúar breska sendiráðsins á Íslandi, utanríkisráðuneytis og Reykjavíkurborgar fluttu ávörp auk þess sem Stefán Pálsson, sagnfræðingur, fór yfir sögu flugvallarins.
Sigrún Björk Jakobsdóttir, framkvæmdastjóri Isavia Innanlandsflugvalla, ávarpaði einnig samkomuna í dag og þakkaði hún öllu því starfsfólki sem á vellinum vinnur, um fimm hundruð manns, fyrir daglegt framlag til rekstrarins. Þar væri starfsfólk fjölda félaga og fyrirtækja á borð við Avians, Landhelgisgæsluna, Icelandair, Norlandair, flugafgreiðsluaðila, þyrlufyrirtækja og flugskóla auk Innanlandsflugvalla.
„Við erum stolt af þessari merkilegu sögu og stolt af flugvellinum,“ sagði Sigrún Björk. „Á okkar ábyrgð er að tryggja á hverjum degi að Reykjavíkurflugvöllur sé opinn og öruggur og geti sinnt sínu hlutverki sem lykilstoð í samgöngukerfi landsins.“
Sigrún Björk benti á að á hverjum degi færu að meðaltali tæplega þúsund farþegar um Reykjavíkurflugvöll eða tæplega 360 þúsund manns á ári hverju. Hreyfingar loftfara, þ.e. lending og flugtök, væru um 40 þúsund árlega. Á síðasta ári hefðu um sex þúsund farþegar farið um Reykjavíkurflugvöll í millilandaflugi, flestir í leiguflug eða til Grænlands.
„Hlutverk flugvallarins í sjúkraflugi er einnig gríðarlega mikilvægt,“ sagði Sigrún. „Á bilinu 13 til fjórtán hundruð sjúkraflug fara um völlinn árlega.“
Sigrún Björk vék einnig að því að Isavia Innanlandsflugvellir hefðu í tilefni tímamótanna endurnýjað söguskilti í Öskjuhlið sem staðsett eru við stríðsminjar og staði sem eiga sér sögu tengda veru hersins og fyrstu ára flugvallarins. Skiltin voru fyrst sett upp árið 2015 eftir hugmynd sem kom inn á Betri Reykjavík. Sagan var þá tekin saman af Friðþóri Eydal og sett í texta á skiltin sjö sem standa á undirstöðum hönnuðum af Árna Tryggvasyni.
„Þar er rakið hvernig fyrstu skref íslensks flugs voru stigin í Vatnsmýrinni fyrir meira en öld síðan og hvernig frumkvöðlar og sjálfboðaliðar ruddu brautina fyrir framtíðarsýn um flug á Íslandi. Skiltin segja einnig frá uppbyggingu flugvallarins á vegum Breta. Skiltin minna fólk á að Reykjavíkurflugvöllur er ekki aðeins mikilvæg samgöngumiðstöð heldur einnig merkilegur vitnisburður um þróun íslensks samfélags, samgöngur á Íslandi og tengingu okkar við umheiminn.“ sagði Sigrún í erindi sínu.
. 
